དུས་རབས་ཀྱི་རྒྱལ་སྲས་ཁྲི་འདོན་དང་བསྟོད་ཚིག་གིས་འཁྲུངས་སྐར་བསུ།༽

རྣམ་དག་ཚུལ་ཁྲིམས་གཙང་མའི་ཡོན་ཏན་དང་།།

གཞན་ཕན་བྱང་ཆུབ་སེམས་ཀྱི་བློ་གྲོས་རྒྱས།།

འཆད་རྩོད་རྩོམ་ལ་ཐོགས་མེད་གཉིས་པ་ཞེས།།

བསྟན་དང་བསྟན་པའི་བདག་པོ་མངའ་གསོལ་ལོ།།

རྒྱལ་བསྟན་སྤྱི་དང་ནང་རྒྱུད་ཡོ་ག་གསུམ།།

འཛིན་སྐྱོང་སྤེལ་ལ་གསང་བདག་གཉིས་པ་ཞེས།།

སྙན་པས་ས་སྟེང་ཁྱོན་ཀུན་ཡོངས་གང་བའི།།

རྒྱུད་སྡེ་རྒྱ་མཚོའི་བདག་པོར་མངའ་གསོལ་ལོ།།

དེ་ལྟར་བདག་གི་བསམ་པ་རྣམ་དག་གིས།།

མངའ་གསོལ་གཟེངས་བསྟོད་ཇི་བཞིན་སྨོན་པའི་མཐུས།།

མི་མངོན་དབྱིངས་ནས་སྲས་བཅས་རྒྱལ་ཀུན་གྱིས།།

མཐུན་གྱུར་བྱིན་རླབས་མཆོག་ཏུ་ད་སྩོལ་ཅིག།

          ༧ཆོས་རྗེ་འཇིགས་མེད་བླ་མས་གསུངས།

       དེ་ཡང་བོད་རྒྱན་ཆུ་སྟག་ལོའི་སྨིན་དྲུག་ཟླ་བའི་ཚེས་བཅོ་ལྔ་ཉིན་ཏེ།  བོད་ཚེས་ལྟར་གྱི་མཁན་ཆེན་སྨྲ་བའི་དབང་ཕྱུག༸ཚུལ་ཁྲིམས་བློ་གྲོས་མཆོག་གི་འཁྲུངས་སྐར་གྱི་དུས་ཚེས་བཟང་པོ་དང་འབྲེལ།   ཆོས་རྗེ་དམ་པ་ཡིད་བཞིན་ནོར་བུ་འཇིགས་ཕུན་ཚོགས་འབྱུང་གནས་ངག་དབང་བློ་གྲོས་མེད་མཆོག་གིས་མཁན་ཆེན་ཚུལ་ཁྲིམས་བློ་གྲོས་མཆོག་ཁྲི་འདོན་གནང་སྐབས་ཀྱི་ཞལ་གསུང་སྒྲ་ཟིན་རྩ་ཆེན་ཞིག་དང་།   སྔ་འགྱུར་རྙིང་མའི་གླེང་སྟེགས་སུ་བཞུགས་པའི་མཁན་སྤྲུལ་གང་མང་གིས་དམ་པ་ཁོང་གི་འཁྲུངས་སྐར་རྟེན་འབྲེལ་ཤིས་ཚིག་གི་བསྟོད་རྩོམ་ཤོ་ལོ་ཀ་རེ་བསྐུར་གནང་བྱུང་བ་ལས།  འབྱོར་རིམ་ལྟར་དུ་མཁན་ཆེན་བླ་མའི་དགོང་གྲངས་ཀྱི་ཚད་དང་མཐུན་པའི་སྙན་རྩོམ་བཅུ་ཕྲག་དྲུག་ལྷག་ཅིག་འགྱུར་འཕྲིན་སྟེགས་སུ་བཀོད་ནས་ངེས་དོན་སྨྲ་བའི་དབང་ཕྱུག་ཁོང་གི་སྐུ་ཚེ་བརྟན་ཅིང་འཕྲིན་ལས་མཐར་རྒྱས་དང་།  བཞེད་དོན་མཐའ་དག་ཡོངས་སུ་འགྲུབ་པའི་སྨོན་འདུན་ཞུ་བ་ལགས་སོ།།

ལྟ་བ་རྟེན་འབྱུང་ཟབ་མོའི་ཚུ༵ལ་རྟོགས་ཤིང་།།

སྒོམ་པ་སྡོམ་གསུམ་ཉམས་ལེན་ཁྲི༵མས་ཀྱིས་བརྒྱན།།

སྤྱོད་པ་བསྡུ་དངོས་བཞི་ཡིས་བཀྲི་མཛད་པའི།།

བྱང་སེམས་བློ༵་གྲོས༵་ཤཱཀྱའི་བསྟན་པའི་རྒྱན།།

                   གླིང་བདེན་ཚིག།

བསྟོད་ཚིག་སྐམ་པོས་མ་དྲེགས་ཐུགས་རྒྱུད་དུལ།།

སྨོད་པའི་གཏམ་གྱིས་མ་འཇིགས་ཀུན་ཕན་བྲེལ།།

བསྟན་འགྲོར་རབ་ཏུ་བརྩེ་བའི་ལྷག་བསམ་གྱིས།།

འཚོས་ཤིང་འཚོ་བའི་ཚུལ་ཁྲིམས་བློ་གྲོས་འདུད།།

                             རྫོཊ་སྐར་ཆེན།

ཤེས་རབ་འོད་ཀྱི་ཕུང་པོ་གངས་ཅན་མིག།

མདོ་སྔགས་རབ་འབྱམས་སྨྲ་བའི་ལྗགས་ལ་དབང་།།

སྔ་འགྱུར་བསྟན་པའི་ཤིང་རྟ་ཆོས་ཀྱི་རྗེ།།

ཀུན་མཁྱེན་ཚུལ་ཁྲིམས་བློ་གྲོས་འཁྲུངས་སྐར་བསུ།།

                           རིག་པའི་ཁུ་བྱུག

མི་ལོ་བཅོ་ལྔའི་ཡུན་ལ་ཁྱེད་ཞབས་བསྟེན།།

སྒེར་དོན་ཕྲན་ཙམ་སྒྲུབ་པ་ངས་མ་མཐོང་།།

བྱང་སེམས་བདག་ཉིད་ཆེན་པོ་ཞེས་བྱ་བ།།

སྲིད་འདིར་མཆིས་ན་ཁྱེད་ལས་མ་དམིགས།།

ཞེས་པ་འདི་ནི་དམ་༢༠༢༢་ལོའི་དམ་པ་གང་གི་འཁྲུངས་ཉིན་གུས་སློབ་མཁས་གྲུབ་རྒྱལ་མཚན་གྱིས་མདོ་སྨད་ཙོང་ཁའི་ཡུལ་ནས་ཆེད་དུ་ཕུལ་བ་དགེ་ཞིང་བཀྲ་ཤིས་པར་གྱུར་ཅིག།

གང་གིས་ལུང་བསྟན་མི་གསུང་གསུངས་པ་དག་ནི་ལུང་བསྟན་བཞིན་དུ་གནད་ལ་ཁེལ། །

གང་གིས་ཚུལ་འཆོས་མི་མཛད་མཛད་པ་དག་ནི་སྐྱེ་འགྲོ་ཀུན་ལ་ཡིད་དུ་འོང་། །

གང་གིས་བབ་ཅོལ་མི་བསྒྲུབ་བསྒྲུབས་པ་དག་ནི་བསྟན་དང་འགྲོ་ལ་གཅིག་ཏུ་སྨན། །

ཁྱེད་ཉིད་འཚོ་ཞིང་གཞེས་ཕྱིར་བདག་ཅག་ཡོངས་ལ་བླང་དོར་མིག་གི་སྒྲོན་མ་གསལ། །

                                 མི་ཉག་རིག་འཛིན་དབང་རྒྱལ།

ལུགས་གཉིས་ཚུ༵ལ་མཐུན་ཁྲི༵མས་ཀྱི་རྩ་བ་བརྟན། །

གཞུང་ལུགས་རིག་པའི་ཚོགས་ལ་བློ༵་གྲོ༵ས་ཡངས། །

མཛད་པ་འཕྲིན་ལས་ལྷོ་གླིང་ཁྱོན་ཀུན་ཁྱབ། །

མཚུངས་མེད་དམ་པ་སྲིད་པའི་རྒྱན་ཅིག་པུ། །

                      གནས་ལུགས་ལམ་འཚོལ་ནས།

འཆ༵ད་པ་སྒྲོས་གཙང་གིས་གདུལ་བྱའི་ཁམས་དབང་སྨིན། །

རྩོ༵ད་པའི་རྩལ་རྫོགས་པས་རྒོལ་ངན་ཀླད་རྒྱ་གཏོར། །

རྩོ༵མ་པའི་སྡེབ་ལེགས་པ་གནའ་དེང་རིག་པའི་རྒྱན། །

ངེས་དོན་མཁས་དབང་དངོས་ཚུལ་ཁྲིམས་བློ་གྲོས་རྒྱལ། །

གངས་ཅན་བོད་པའི་གནའ་དེང་རིག་པའི་བང་མཛོད་ཆེན་མོའི་འཁྲུངས་སྐར་ཉིན་མི་ཉག་པ་ཚེ་རྒྱམ་གྱིས་ཕུལ།

རྨད་བྱུང་དུས་ཀྱི་སློབ་དཔོན་ཆེ།།

རྟེན་འབྲེལ་གསང་བའི་ལམ་ཀ་སྟོན།།

བློ་གྲོས་པད་མོ་འབྱེད་པའི་གཉེན།།

རྒྱལ་ཀུན་ཡབ་གཅིག་ཉིད་དང་མཚུངས།།

                       ཨ་དམར་པོ།

ཁྱེད་ཀྱི་རྣམ་དཔྱོད་རིག་པས་འཛམ་གླིང་གི །

གནའ་དེང་ཚན་རྩལ་རིགས་པ་ཕྲ་ཞིབ་རྟོགས། །

མཚན་དང་སྙན་གྲགས་ལྡན་པའི་མཁས་པ་མང་། །

ཁྱེད་ནི་དོན་ལྡན་གཞན་རྣམས་དེ་ལྟར་མིན། །

                        བསེ་རུ་དེས།

ལྷོ་གླིང་ནོར་འཛིན་ཡངས་པའི་དོ་ར་འདིར། །

ཆེ་དགུའི་མཚན་སྙན་འབར་བའི་སེམས་ཀྱི་ལྷ། །

གངས་ལྗོངས་མཁས་པ་ཡོངས་ཀྱི་གཙུག་གི་ནོར། །

ལྔ་རིག་སྨྲ་བའི་དབང་པོའི་འཁྲུངས་སྐར་བསུ། །

༢༠༢༢–༡༢–༧ཉིན་གུས་སློབ་འབའ་ལྗང་སྨྲུག་ནས།

ཡང་དག་དཔྱོད་པའི་ཤེས་རབ་ཚུ༵ལ་མངའ་ཞིང་།།

སྡོམ་གསུམ་བསླབ་ཁྲི༵མས་རྒྱན་དུ་ལེགས་རྩོལ་བ།།

བྱང་སེམས་བློ༵་བཀྲ་འཇིགས་མེད་སྨྲ་བའི་སྲས།།

ང་ཅག་ལུགས་གཉིས་གྲོ༵ས་འདེབས་འདི་དག་རྨད།།

                        འཇུ་གཞོན།

བསྟན་པའི་སྙིང་པོ་འཛིན་ལ་ཟླ་བྲལ་ཞིང་། །

ཉམས་ཐག་འགྲོ་བའི་གཉེན་གྱུར་པད་དཀར་འཛིན། །

གནའ་དེང་ལུགས་གཉིས་བཟང་པོའི་ལམ་སྲོལ་མཁན། །

ས་ཆེན་སྐྱེ་དགུའི་མགོན་དེར་སྙིང་ནས་གུས། །

                            རྨེ་མཚོ་བྱུང་།

རྗེས་ཆགས་ཕྱོགས་རིས་མིག་གིས་ཐུགས་རྒྱུད་བསྐུལ་ཏེ་རྣམ་དག་བསྟན་པ་དཀྲུག་མ་མྱོང་། །

རང་དང་རང་གི་ཉེ་འཁོར་ཁ་ལ་ཁྱེར་ཏེ་སྤྱི་ལ་དོ་ཁུར་ཆུང་མ་མྱོང་། །

རྙེད་དང་བཀུར་སྟིའི་ཆང་གིས་ར་རོར་གྱུར་ཏེ་ཉམ་ཐག་འགྲོ་བ་བརྗེད་མ་མྱོང་། །

རྨོངས་པའི་དད་འདུན་གཙང་མ་ལོག་པར་སྤྱོད་དེ་སྤྱི་ཚོགས་ཟང་ཟིང་གཏོང་མ་མྱོང་། །

                               གུས་པ་འོད་ཟེར་སྐྱབས།

གནའ་དེང་རིག་པའི་ཤེས་བྱའི་ཆོས་ཚུ༵ལ་གང་ལ་ཡང་། །

སྒྲིབ་དང་ཕྱོགས་ལྷུང་ཁྲི༵མས་གྱི་མཐའ་རྒྱ་ལས་གྲོལ་ཏེ། །

འཇིགས་མེད་བླ་མའི་མཁྱེན་རབ་བློ༵་གྲོ༵ས་གཏེར་གྱི་མཛོད། །

ཤར་ནུབ་མཁས་རྒུའི་གཙུག་གི་རྒྱན་དུ་འཁྲུངས་པ་ལེགས། །

                     ངག་གི་ལང་ཚོས།

དེང་ཆར་གངས་ཀྱི་ལྗོངས་འདིའི་ཆོས་རིག་ཀུན།།

ཆེས་ཆེར་གསལ་བའི་མཛད་ཕྲིན་མངའ་ཐང་ཅན།།

སེམས་ཁོང་ཉི་མ་གཞོན་ནུ་ཁྱེད་ཡིན་པས།།

སྐུ་ཚེ་ཡུན་དུ་མི་ནུབ་འཆར་གྱུར་ཅིག།

       ཅེས་ཁྲོཾ་ལྗོངས་པ་བསྟན་འཛིན་ཉི་མས།

ཕྱི་ལྟར་ཚུལ་ཁྲིམས་ཉེས་སྐྱོན་ཀུན་དང་བྲལ། །

ནང་ལྟར་བྱང་ཆུབ་སེམས་ལ་བློ་གྲོས་རྒྱས། །

གསང་བ་གསང་ཆེན་སྙིང་པོའི་དགོངས་དོན་རྟོགས། །

ཁྱབ་བདག་འགྲོ་བའི་མགོན་པོས་འཁྲུངས་སྐར་བསུ། །

ཞེས་སློབ་འབངས་ཡོངས་ཀྱི་གྲལ་མཐའ་བ་ཐུགས་མཛོད་ནས། ༢༠༢༢ ༡༢ ༧ ལའོ།།

གང་ཐུགས་དཔལ་གྱི་བེའུའི་གསང་མཛོད་ཀྱི། །

ཟབ་མོ་འདོད་འབྱུང་ནོར་བུའི་གཏེར་ཆེན་པོ། །

གང་འདུལ་གདུལ་བྱའི་ཡིད་ལ་སྟེར་མཁས་པའི། །

མཁྱེན་བརྩེ་ནུས་པའི་རྣམ་ཐར་ཨེ་མ་རྨད། །

ཅེས་གོ་བཀྲ་ཤིས་མིང་པས་བླ་མའི་འཁྲུངས་སྐར་ཉིན་གུས་ཕུལ།

བརྩེ་བའི་འཛུམ་གྱིས་ཡིད་སེམས་རབ་ཏུ་དྲངས།།

གཞོམ་མེད་གསུང་གིས་བདེན་པའི་ལམ་དུ་འདྲེན།།

ཞི་ཞིང་དུལ་བས་དགེ་སྦྱོང་ཆོས་བཞིའི་བརྒྱན།།

གངས་ལྗོངས་སྨྲ་བའི་དབང་ཕྱུག་སྐྱབས་སུ་བསྙེན།།

ཞེས་པ་འདི་ནི་༢༠༢༢་ལོའི་དམ་པ་གང་གི་འཁྲུངས་སྐར་ཉིན་གུས་སློབ་བཟོད་པ་རྒྱལ་མཚན་གྱིས་གསེར་ལྗོངས་བླ་མ་རུང་ནས་ཆེད་དུ་ཕུལ་བ་དགེ་ཞིང་བཀྲ་ཤིས་པར་གྱུར་ཅིག།

དེང་ཆར་གངས་ཀྱི་ལྗོངས་འདིའི་ཆོས་རིག་ཀུན།།

ཆེས་ཆེར་གསལ་བའི་མཛད་ཕྲིན་མངའ་ཐང་ཅན།།

སེམས་ཁོང་ཉི་མ་གཞོན་ནུ་ཁྱེད་ཡིན་པས།།

སྐུ་ཚེ་ཡུན་དུ་མི་ནུབ་འཆར་གྱུར་ཅིག།

       ཅེས་ཁྲོཾ་ལྗོངས་པ་ལྷོ་རིགས་ཤེས་ཀྱིས།

ཆོས་བརྒྱད་སོས་ཁའི་སྤྲིན་བཞིན་རྒྱངས་དུ་དོར། །

ཡོན་ཏན་ཆུ་བོའི་གཏེར་ལ་མངའ་དབང་འབྱོར། །

ཕྲག་ཏོག་མཚོན་ལ་བཟོད་པའི་ལན་མང་སྟེར། །

ཐུབ་བསྟན་མཛེས་པའི་རྒྱན་གཅིག་སྨྲ་བའི་དབང་། །

ཞེས་པ་འདི་མཁན་ཆེན་ཚུལ་ཁྲིམས་བློ་གྲོས་ཀྱི་འཁྲུངས་སྐར་དུ་ཡེ་ཤེས་དོན་རྟོགས་ནས།

ཚུ༵ལ་མཐུན་འབད་བརྒྱས་གོ་ལའི་སྣོད་བཅུད་སྲུང་།།

ཁྲི༵མས་མཐུན་ཆོས་སྲིད་ལུགས་གཉིས་འགལ་མེད་སྐྱོང་།།

བློ༵་མཐུན་ཚེ་སྲོག་འདྲ་མཉམ་ལག་ལེན་བསྟར།།

གྲོ༵ས་མཐུན་རྡོག་རྩ་གཅིག་སྒྲིལ་ཀུན་ལ་གདམས།།

ཕ་བཟང་རྗེས་ཤུལ་ཟིན་པའི་སྙིང་སྟོབས་ཅན།།

ཚུལ་ཁྲིམས་བློ་གྲོས་འཛམ་གླིང་མཛེས་པའི་རྒྱན།།

ཞེས་པའང་བསམ་རི་བ་བསོད་ནམས་ཚེ་བརྟན་དེས་དམ་པ་ཁོང་གི་འཁྲུངས་སྐར་ལ་རང་བཞིན་བརྗོད་པའི་ལེགས་སྐྱེས་སུ་གུས་ཕུལ།2022

ཨོ་རྒྱན་པདྨའི་རྣམ་རོལ་འཇིགས་མེད་རྗེའི།།

གསང་གསུམ་ཡོན་ཏན་བྱེ་བའི་མཛོད་འཛིན་པ།།

དུས་ཀྱི་སྟོན་མཆོག་ཚུལ་ཁྲིམས་བློ་གྲོས་ཀྱི།།

ཞབས་པད་སྲིད་མཐའི་བར་དུ་བརྟན་གྱུར་ཅིག།

གསེར་ཐང་བླ་རུང་ནས་མགོན་པོ་གང་གི་སློབ་མའི་གྲལ་མཐར་འཁོད་པ་རོང་དུག་གིས་ཕུལ།

མཁྱེན་བརྩེ་ནུས་གསུམ་ཡོན་ཏན་མཚུངས་པ་མེད།།

གངས་ཅན་ཆོས་སྲིད་ཉི་ཟླའི་དབུ་འཕང་བསྟོད།།

འཛམ་བུ་གླིང་ལ་ཆོས་ཀྱི་ཆར་བ་འབེབས།།

མཁན་ཆེན་བྱང་ཆུབ་སེམས་དཔའི་འཁྲུངས་སྐར་བསུ།།

                        བོད་ཀྱི་ལོ་མ།

ཚུ༵ལ་འཆོས་དྲི་མས་ནག་པོར་མ་བསྒྱུར་ཞིང་། །

བསླབ་གསུམ་ཁྲི༵མས་ཀྱི་ཁ་དོག་མ་ཡལ་བར། །

ཐབས་ཤེས་ཟུང་དུ་འཇུག་པའི་མཛད་པ་རེས། །

སྐྱེ་དགུ་རྣམས་ལ་བློ༵་གྲོ༵ས་སྩོལ་མཁས་པའི། །

མཁན་ཆེན་བླ་མ་དམ་པའི་སྐུ་ཚེ་བརྟན། །

                       མེ་སྤྱང་གིས།

ཐུགས་བསྐྱེད་པད་དཀར་སྡོང་བོ་ལ། །

ཚུ༵ལ་ཁྲི༵མས་གཙང་མའི་ལོ་འདབ་རྒྱས། །

བློ༵་གྲོ༵ས་འབྲས་བུ་གཡུར་དུ་ཟ། །

བྱང་སེམས་ལྷ་ཡི་ལྗོན་པ་རྨད། །

             མདོ་ཁྱུང་སྔོན་གྱིས།

ཁྱེད་ནི་ང་ཚོའི་ལམ་སྟོན་མཁན། །

སླབས་གསུམ་ནོར་བུའི་རྒྱན་གྱིས་སྤྲས། །

གནའ་དེངས རིགས་པའི་གཞུང་ལུགས་ལ། །

འཆད་རྩོད་རྩོམ་གསུམ་ཐོགས་པ་མེད།།

                        ཀཱི༔བླ་མ་མཁྱེན།

ཀུན་རྨོངས་མུན་པ་སེལ་བའི་ཉི་མ་ཡིན།།

ཞི་བསིལ་དམ་ཆོས་ཟླ་བ་དཀར་པོ་ཡིན།།

རིན་བྲལ་དགོས་འདོད་ཀུན་འབྱུང་ནོར་བུ་ཡིན།།

ཡིན་པ་གསུམ་ལྡན་མཁན་ཆེན་མཆོག་ལ་འདུད།།

              ཕུག་དགོན་གྲོང་དགེ་བ་གུ་མིང་པས།

གནའ་དེང་རིག་པའི་ཤེས་བྱ་མ་ལུས་མཁྱེན། །

ཉམས་ཐག་འགྲོ་རྣམས་བརྩེ་ཆེན་སྙིང་རྗེས་བཟུང་། །

འཛམ་གླིང་ཡོངས་སུ་འགྲོ་དོན་ནུས་མཐུ་སྨིན། །

སྟོན་དང་བསྟན་པའི་བདག་པོ་གང་དེར་རྒྱལ། །

                        རྣམ་པར་རྒྱལ།

ཚུ༵ལ་ཁྲི༵མས་རྒྱ་མཚོ་རབ་ཏུ་རྫོགས་བྱེད་ནས། །

བློ༵་གྲོ༵ས་རྒྱ་མཚོ་རབ་ཏུ་སྒོ་འབྱེད་ཅིང་། །

སེམས་ཅན་རྒྱ་མཚོ་རབ་ཏུ་སྨིན་བྱེད་པའི། །

རྐང་གཉིས་མཆོག་གྱུར་མཁན་ཆེན་གཙུག་ན་རྒྱན།།

                                གསེར་ཁྱུང་། 

རྣམ་དག་ཚུ༵ལ་ཁྲི༵མས་ཕུང་པོའི་རྩ་བ་བརྟན།།

བཅུ་ཕྲག་རིག་པའི་གཏེར་ལ་བློ༵་གྲོ༵ས་རྒྱས།།

ཡོངས་རྫོགས་བསྟན་པའི་བདག་པོ་འགྲོ་བའི་མགོན།།

ཞབས་པད་རྡོ་རྗེའི་གཤིས་སུ་བརྟན་གྱུར་ཅིག

                     ཆོས་འཚོལ་ནས།

རྣམ་དག་ཚུལ་ཁྲིམས་དབྱིག་འཛིན་ཕུང་པོའི་ཁམས། །

རྣམ་གསལ་བློ་གྲོས་སྣང་བྱེད་དཀྱིལ་འཁོར་ཡངས། །

རྣམ་དཀར་འོད་བཟང་གོ་ལའི་ཁྱོན་བརྡལ་བའི། །

རྣམ་མང་འགྲོ་བའི་ཉེར་འཚོར་རྟག་འཆར་གསོལ། །

               རྫོགས་ཆེན་མཁན་ཆེན་ཁྲི་བ་ཨ་ཆོས་ནས།

བཤེས་གཉེན་ཚུ༵ལ་བཟུང་ཁྲི༵མས་ལྡན་རི་བོང་འཛིན། །

ལུགས་གཉིས་མཁྱེན་པའི་བློ༵་གྲོ༵ས་མཁའ་ལྟར་ཡངས། །

སྙིགས་ལྔའི་མུན་སེལ་རྒྱལ་སྲས་སེམས་དཔའི་གཟུགས། །

ཉག་ཐག་འགྲོ་བའི་མགོན་དུ་འཚོ་བཞེས་གསོལ། །

                            ཨ་སྲས་ནས།

ཚུ༵ལ་ཁྲི༵མས་གསེར་གྱི་ཕྲེང་བའི་འོད་ཁྱིམ་དུ།།

བློ༵་གྲོ༵ས་རྩལ་རྫོགས་ཀུན་མཁྱེན་རྒྱལ་བ་དངོས།།

ཡབ་རྗེ་བླ་མའི་སྙིང་གི་དཔལ་བེ་འུ།།

གངས་རིའི་བཤེས་གཉེན་བླ་མའི་འཁྲུངས་སྐར་བསུ།།

མཁྱེ༵ན་པས་ཚན་རྩལ་རིག་པའི་གནད་ཀུན་གཟིགས།།

བརྩེ༵་བས་ཁམས་གསུམ་འགྲོ་ཀུན་བུ་བཞིན་སྐྱོང་།།

ནུ༵ས་པས་གཞུང་ཀུན་བགྲོད་པའི་ཐེམས་སྐས་བཙུགས།།

ཀུན་མཁྱེན་ཀུན་གཟིགས་བླ་མའི་འཁྲུངས་སྐར་བསུ།།

དབྱངས་ཅན་ཡིད་ཀྱི་འཁྲི་ཤིང་ནས་བོད་ཟླ་༡༠པའི་ཚེས་༡༥ལའོ།།

ཚུ༵ལའཆོས་སྙེམས་པའི་རྒྱ་རུ་མ་ཚུད་ཅིང་། །

ཁྲི༵མས་ལྡན་འདུས་པའི་གཙུག་གི་ཏོག་གཅིག་པུ། །

ཕྱི་ནང་ཉེར་འཚེའི་དབལ་གྱིས་མི་འཇིགས་པའི། །

བློ༵་གྲོ༵ས་མཁའ་ལྟར་ཡངས་པ་ཁྱོད་ལས་སུ། །

རིགས་ཀྱི་སྐད་ཡིག་འཆི་ཁའི་ཉེན་ལས་བསྐྱབས། །

འཇིགས་རུང་ཨེ་ཛིའི་ནད་ལ་ཉེན་བརྡ་བཏང་། །

མགོན་མེད་གཉོམ་ཆུང་སྲོག་གི་གཉེན་གཅིག་པུ། །

བྱམས་ཆེན་ཆོས་ཀྱི་ཉི་མ་ཞབས་བརྟན་གསོལ། །

འབངས་ཕྲན་དུས་ཀྱི་འོད་སྣང་གིས་དམ་པ་ཁོང་གི་འཁྲུངས་སྐར་ཏེ་༢༠༢༢བོད་ཟླ༡༠ཚེས༡༥ལ་གུས་ཕུལ།

རྣམ་དག་ཚུལ་ཁྲིམས་གསེར་གྱི་ལྷུན་པོ་བརྗིད།།

རྨད་བྱུང་བློ་གྲོས་ཉི་ཟླའི་རྣ་ཆ་མཛེས།།

དྲི་མེད་ལེགས་བཤད་འོད་སྣང་འགྲོ་ལ་འགྱེད།།

མཚུངས་མེད་དམ་པའི་སྐྱེས་བུ་ཞབས་བརྟན་གསོལ། །

                      གངས་བུ་རྩེ་རྒྱལ་ནས་སོ།།

བྱམས་བརྩེ་མཐོང་གྲོལ་དུང་ཟླའི་ཞལ་བཟང་ལས།།

ལུགས་གཉིས་ལེགས་བཤད་བདུད་རྩིའི་བསིལ་ཟེར་འཇོ།།

སྐྱེ་དགུའི་ཡིད་ཀྱི་སྨག་རུམ་ཡོངས་བསལ་ཏེ།།

གདོད་མའི་མགོན་པོའི་རང་ཞལ་མངོན་དུ་བྱས།།

འགྲོ་དོན་རྟག་རྒྱས་བཞེད་དོན་ལྷུན་གྲུབ་ཤོག།

༢༠༢༢ལོའི་བོད་ཟླ་༡༠པའི་ཚེས་༡༥ཉིན་མཁན་ཆེན་བླ་མའི་འཁྲུངས་སྐར་ལ་དབང་ཞགས་ནས་གུས་པས་ཕུལ།

བྱམས་བརྩེ་ཟླ་བ་ལྟ་བུའི་དཀར་སངས་སངས། །

ཤེས་རབ་ཉི་མ་འདྲ་བའི་འོད་ལམ་ལམ།།

ཐུགས་བསྐྱེད་སྐར་མ་ལྟ་བུའི་ཁྲ་ཆེམ་ཆེམ།།

འགྲོ་བའི་བསོད་ནམས་མཁའ་རུ་ཤར་བ་ཡི།།

དུས་ཆེན་དུས་དེ་དེ་རིང་ཚེས་པ་ཡིན།།

                 འཇིགས་མེད་སེང་གེ།

གང་སྐུ་མཇལ་ན་དྲི་མེད་སྤྲིན་དཀར་སྐྱོད།།

གསུང་ནི་བདུད་རྩིའི་ཆར་བཞིན་སྣོད་བཅུད་སྨིན།།

ཐུགས་བསྐྱེད་ཉི་ཟླའི་འཁོར་ལོ་འབར་བ་ཅན།།

བསྟན་འགྲོའི་བསོད་ནམས་གཙུག་ཏུ་བྱོན་པ་ལེགས།།

                     མགྲོན་པོ།

སྟོབས་ལྡན་ཐལ་ཀར་ཆིབས་སུ་བཅིབས་ཏེ་ཕ་རོལ་ཕྱིན་པའི་མཆེ་བ་ངོམ།།

མེ་ཏོག་དམར་པོའི་ཞགས་པ་བཟུང་ཞིང་སྒྱུ་མར་རོལ་པའི་ཟློས་གར་བསྒྱུར།།

ལྷུན་མཉམ་ཆེན་པོའི་རི་དབང་རྩེར་བཞུགས་ཟླ་བ་དཀར་པོའི་གཙུག་རྒྱན་འཛིན།།

སྐྲ་ལོའི་གསེང་གི་ཟིལ་ཐིགས་གཅིག་གིས་སྟོང་པའི་ཁམས་སུ་བཀྲག་མདངས་སྦར།།

                          གྲོག་མ།

ཀུན་ལ་ཕན་བདེའི་འོད་སྣང་རབ་སྟེར་བས།།

ཀུན་རྨོངས་མུན་པའི་སྨག་རུམ་རབ་བསལ་ཏེ།།

ཀུན་རིག་རྟ་བདུན་དབང་པོ་རབ་གསལ་བའི།།

ཀུན་གཟིགས་མཁན་ཆེན་འཁྲུངས་པར་རབ་ཏུ་སྤྲོ།

          ཧོར་བན་ཀར་མིང་གིས་ཆུ་སྟག་ཟླ་༡༠ཚེས་༡༥ལའོ།།

ལྷ་ཡི་སྲས་ཞེས་ཆེ་བརྗོད་མི་སྤྲོ་དགེ་སྦྱོང་ཆོས་སྨྲ་བ།།

མཛད་པ་ཕྱག་ལས་འདྲ་མཉམ་ཅན་གྱི་སྤྱོད་པ་ཀུན་སློང་འཕགས།།

ཆོས་ཀྱི་ཁྲི་སྟེང་ངལ་གསོ་མཛད་ལ་ཆོས་བརྒྱད་དུག་བཞིན་སྤངས།།

ངེས་དོན་བྱང་ཆུབ་སེམས་དཔའ་ཞིག་གི་ཁྱད་ཆོས་ཡུལ་ལས་འདས།།

                                         འཇུ་ལྷ་སྲས་ཀྱིས།

མཁྱེན་དཔྱོད་ཡོད་མེད་བཤད་པར་བརྒྱ་ལས་འཆད་རྩོད་བརྩོམས་པའི་གཞུང་ལ་ལྟོས།།                              

བྱམས་བརྩེའི་སྟོང་གི་ཐུགས་རྒྱུད་བརླན་མིན་ཚེ་སྲོག་འགོས་ནད་སྐྱོབས་ལ་ལྟོས།།                                                                         

ཕན་ནུས་ལྡན་མིན་གླེང་བརྗོད་འབུམ་ལས་གོ་ལའི་མུ་ཁྱུད་བརྒལ་འདི་ལྟོས།།

ཨེ་མ་ཕྲག་དོག་མུན་པའི་ཁྲོད་ན་སྲིད་གསུམ་སྒྲོན་མེ་རྟག་བརྟན་ཤོག།།                                                 

ཕྱི་ལོ་༢༠༢༢-༡༢-༡༡་བྱང་སེམས་བདག་ཉིད་ཆེན་པོ་མཁན་ཆེན་མཆོག་གི་འཁྲུངས་སྐར་ལ། གུས་པ་བསོད་ནམས་རྣམ་རྒྱལ་ནས།

འབྲོང་རྒོད་ཁྲོས་པའི་ངར་ལྷབ་རེ་རེས་སྙིང་རྗེ་འབར་བའི་ཁ་རླངས་དང་བཅས་ས་ཆེན་མཚོ་མོ་ཡོམ་ཡོམ་གཡོ།།

ཁྱུང་ཆེན་ལྡིང་བའི་གཤོག་རྩལ་རེ་རེས་ཐབས་ཤེས་བསྐྱོད་པའི་ཉི་ཟླ་དང་བཅས་མཁའ་མཐའི་རྒྱ་ཁྱོན་རླབས་ཀྱིས་འཇལ།།

དཔྱིད་རླུང་ལྡང་བའི་མེ་དྲོད་རེ་རེས་དབྱར་རྔ་བསུ་བའི་གྲེ་འགྱུར་དང་བཅས་ངག་གི་མེ་ཏོག་ཡང་ཡང་འགོད།།

ཁ་དོག་བཀྲ་བའི་འདབ་མ་རེ་རེས་རྩི་བཅུད་འཛིན་པའི་བྲེལ་བ་དང་བཅས་དབྱར་གྱི་དཔལ་ཡོན་ཞིང་འདིར་དྲངས།།

                                                      སྤྱང་ཚ།

དུས་སྙིགས་མའི་བསྐལ་བ་མར་འགྲིབ་ལ།།

སྐྱབས་འཁོར་ལོའི་མགོན་པོས་སྤྲུལ་བའི་གར།།

གོས་ངུར་སྨྲིགས་བསྟན་པའི་དེད་དཔོན་མཆོག།

རྗེ་ཚུལ་ཁྲིམས་བློ་གྲོས་ཞབས་ལ་འདུད།།

རིས་མེད་ཀྱི་བསྟན་པ་དར་བ་དང་།།

མཐའ་མེད་ཀྱི་འགྲོ་རྣམས་བདེ་བར་སྨོན།།

                               འཇའ་ཁོ་ནས།

མཁྱེན་པས་གནའ་དེང་རིག་པའི་གསང་བ་ཕྱེས།།

བརྩེ་བས་ཉམ་ཐག་སྐྱེ་འགྲོའི་མགོན་དུ་བཞེངས།།

ནུས་པས་གངས་རིའི་རིགས་ཀྱི་བླ་སྲོག་སྲུང་།།

ཉེར་གཅིག་རིགས་པའི་དཔའ་བོ་བདག་གི་མགོན།།

                    མཁྱེན་རབ་ཟླ་བས།

རྫུན་དང་བཅོས་མའི་ཚིག་མེད་ཚུ༵ལ་བཞིན་གཏམ། །

སྨྲ་ལ་ཟླ་བྲལ་ཁྲི༵མས་ལྡན་དགེ་སྦྱོང་ཁྱེད། །

གང་ལ་ཐོགས་མེད་བློ༵་གྲོ༵ས་མཚུངས་པ་མེད། །

ཐུབ་བསྟན་གསལ་བའི་སྒྲོན་མེའི་འཁྲུངས་སྐར་བསུ། །

འགོང་པོ་སྙིང་ལ་ཞུགས་པ་ལོག་སྨྲའི་སྡེས། །

ཚིག་ངན་མདའ་ཆར་འཕངས་པ་གྲངས་མེད་ཀྱང༌། །

རྨད་བྱུང་གསང་གསུམ་ཡེ་ཤེས་དཀྱིལ་འཁོར་ཆེ། ། །

ལྷུན་པོ་ལྟར་བཞུགས་དཔའ་བོའི་འཁྲུངས་སྐར་བསུ། །

དགྱེས་པའི་འཛུམ་ཞལ་མཛེས་པའི་པད་དཀར་དངོས། །

བརྩེ་བའི་གསུང་བཟང་མཚོ་བྱུང་ལྷ་མོའི་དབྱངས། །

ལྷག་པའི་མཛད་པ་རྒྱལ་སྲས་འཇམ་པའི་དབྱངས། །

གངས་རིའི་མཛེས་རྒྱན་མཛངས་པའི་འཁྲུངས་སྐར་བསུ། །

                            ལྷོ་ཙན་དན་དཀར་པོ་ནས་ཕུལ།

ལྟ་བ་ཀློང་ཆེན་སྒོམ་པ་འཇིགས་མེད་གླིང་།

སྤྱོད་པ་རྒྱལ་བའི་མྱུ་གུ་ཉིད་དང་མཚུངས་།

རིས་མེད་དཔལ་སྤྲུལ་ལུགས་གཉིས་མི་ཕམ་དང་།

གཉིས་མེད་མཁན་ཆེན་བླ་མའི་འཁྲུངས་སྐར་བསུ།

                            མགར་ཆོས་དོན་ནས།

འཛུམ་ཞལ་བཅོ་ལྔའི་ཟླ་བ་ལ༎

ཤེས་རིག་སྐར་ཚོགས་འོད་ཟེར་འཕྲོས༎

ལྷོ་གླིང་མུན་པ་མཐའ་ནས་བསལ༎

ཁྱེད་ནི་གངས་རིའི་མགོན་པོ་དངོས༎

འཁྲུངས་པ་འགྲོ་བའི་བསོད་ནམས་ཡིན༎

བཞུགས་པ་བསྟན་པའི་རྒྱན་གཅིག་ཡིན༎

སྲིད་པ་འཇིག་རྟེན་མ་གཏོང་བར༎

གཡོ་མེད་བཞུགས་པར་གསོལ་བ་འདེབས༎

གངས་ལྗོངས་སྨྲ་བའི་དབང་ཕྱུག་འཁྲུངས་སྐར་བསུ།

                      དྷཱིཿམུན་སེལ།

ཐུགས་བསྐྱེད་གདུ༵གས་དཀར་བླ་ན་མཐོ་ཞིང་ཚུ༵ལ་ཁྲི༵མས་པདྨ༵འི་རྩ་བ་བརྟན། །

བློ༵་གྲོ༵ས་གས༵ར་ཉ༵འི་གཤོག་རྩལ་མ་ཞན་གནའ་དེངས་རིག་པའི་གཏེར་བུ༵མ་སྦྲུམ། །

གཟུངས་སྤོབས་དཔ༵ལ་བེ༵འུ་རེ་ཁ་རྣམ་བཀྲ་ཆོས་ཀྱི་རྒྱ༵ལ་མཚ༵ན་བསྒྲེངས་ལ་དཔའ། །

མཛད་འཕྲིན་དུ༵ང་གི་སྒྲ་དབྱངས་སྙན་མོ་འཛིན་མའི་འཁོ༵ར་ལོ༵འི་སྤོ་ལ་རེག །

                                   མདོ་ཁྱུང་སྔོན་གྱིས།

ཐུབ་བསྟན་ཡོངས་འདུས་དཔག་བསམ་ལྗོན་ཤིང་མི་ནུབ་འཛིན་སྐྱོང་སྤེལ་བའི་གཉེན། །

མཁས་བཙུན་བཟང་པོའི་དཔལ་གྱིས་ཕྱུག་པའི་བསིལ་ལྗོངས་འཛིན་མ་མཛེས་པའི་ཏོག །

རིགས་ཀྱི་བདག་པོ་ཆོས་རྗེ་བླ་མའི་མཛད་འཕྲིན་ཁ་ལོ་བསྒྱུར་བའི་འཕྲུལ། །

ཕྲིན་ལས་འོད་ཀྱིས་ས་གསུམ་ཁྱབ་ནས་སྐྱེ་རྒུའི་དཔལ་དུ་རྟག་བརྟན་ཤོག །

                              གུས་སློབ་རྣོ་ཟེར་ནས་ཕུལ།

རྨད་བྱུང་ཚུ༵ལ་ཁྲི༵མས་བཟང་པོའི་རྒྱན་བཟང་འཆང་།།

རྒྱ་ཆེན་ཤེས་བྱའི་གནས་ལ་བློ༵་གྲོ༵ས་རྫོགས།།

མཐའ་མེད་འགྲོ་བའི་གཉེན་གཅིག་ཤཱཀྱའི་སྲས།།

མཚན་དཔེའི་དཀྱིལ་འཁོར་ཤར་བའི་དུས་བཟང་ཚེས།།

བོད་ཟླ ༡༠ ཡར་ཚེས ༡༥ ཉིན་ཤར་རལ་གྲི་འམ་བསོད་རྒྱལ་ནས་ཕུལ།

རྨད་བྱུང་ཚུལ་ཁྲིམས་དྲི་ངད་ལྡང་བ་ཡི།།

བློ་གྲོས་མཚན་དཔེའི་འདབ་སྟོང་བཞད་པའི་མགོན།།

སྲིད་གསུམ་སྐྱེད་ཚལ་གང་དུ་བཞད་གྱུར་ཀྱང་།།

མོས་ལྡན་བུང་བའི་ཚོགས་བཞིན་འདུས་པ་མཚར། །

                 གྲ་ནང་འ་བུ།

གནའ་དེང་རིག་པའི་གསང་ལམ་སྣང་བའི་གཉེན། །

དུས་སུ་སྨིན་པའི་དྲི་བྲལ་དགེ་བའི་བཤེས། །

མཐོང་གྲོལ་མཚན་དཔེའི་དཀྱིལ་འཁོར་མི་མཐུན་མེད། །

བདག་གི་མགོན་དུ་ཐོབ་པ་བསོད་ནམས་ཆེ། །

དམ་པའི་ནོར་གྱིས་ཕྱུག་པའི་མཛད་བཟང་རེས། །

མཐའ་མེད་བསྟན་འགྲོར་སྨིན་པའི་ཁུར་ཆེན་གཟུགས། །

མངོན་སུམ་ཡུལ་དུ་སྣང་བའི་ངོ་མཚར་ཀུན། །

ནམ་ཡང་གཡོ་མེད་སྲིད་མཐར་རྟག་བརྟན་སྨོན། །

༧མཁན་ཆེན་བླ་མའི་འཁྲུངས་སྐར་ཉིན་གུས་སློབ་དྷཱི་དམར་པས།

ཐབས་ཤེས་མཆོག་འཆང་གཤོག་ཟུང་ཡངས་པོ་ཡིས། །

ལྷོ་གླིང་འཛིན་མའི་ཁྱོན་ཀུན་གློག་བཞིན་འཁྱུག །

མཁྱེན་བརྩེ་འཇམ་སྤྱན་རྗེས་འགྲོ་སྣང་གསལ་ལྷ། །

སྐུ་ཚེ་ཉི་ཟླ་མཉམ་ཕྱིར་འཁྲུངས་སྐར་བསུ། །

ཞེས་པའང་ཤར་ཀོང་ཡུལ་ལྗོན་པ་ལུང་ནས ༧ མཁན་ཆེན་བླ་མའི་འཁྲུངས་སྐར་ཉིན་ཨ་བྷེ་བཛྲ་ནས་སོ།།

ཉེར་གཅིག་དུས་རབས་གསར་བའི་མདུན་ལམ་ན།།

ལུགས་གཉིས་བླང་དོར་ལྟ་བའི་མིག་ཟུང་ནི།།

གྲངས་མེད་འགྲོ་ལ་སྩོལ་བའི་སྦྱིན་བདག་ཆེ།།

ཁྱོད་འཁྲུངས་དོན་དང་ལྡན་ནོ་ཤཱི་ལའི་མཚན།།

             གུས་སེང་མིང་པས།

ཚུལ༵་མིན་རིང་དུ་དོར་བའི་མཛད་སྤྱོད་ལ། །

ངང་བཟང་ཁྲིམས༵་ཀྱི་རྩ་བ་རབ་ཏུ་བརྟན། །

བློ༵་གྲོས༵་མཆོག་གིས་འགྲོ་ལ་ཆོས་སྟོན་པའི། །

བྱངས་སེམས་བདག་ཉིད་ཆེན་པོའི་འཁྲུངས་སྐར་བསུ། །

               དཔལ་གྱི་སྙེ་མ།

ཚུ༵ལ་ཁྲི༵མས་ལྗོན་པའི་འཁྲི་ཤིང་རྩེ་ལ་བློ༵་གྲོ༵ས་སྤོབས་པའི་ལོ་འདབ་རྫོགས།།

ལུགས་གཉིས་མཛད་པའི་སྒོ་མོ་དག་ནི་ལ་ཁའི་དཀར་པོ་ཆིག་ཐུབ་ཞིག།

འཚོ་བ་དངོས་ནི་གྲྭ་རྐྱང་ཞིག་སྟེ་གཞན་དོན་རྐྱང་པའི་གཟེབ་ཏུ་བྲེལ།།

གངས་རིའི་བསོད་ནམས་མེ་སྟག་འདྲ་དེའི་བསྐལ་བརྒྱའི་བར་ཏུ་འཆུན་པར་སྨོན།།

བོད་རབ་རྒྱན་ཆུ་སྟག་ལོའི་སྨིན་དྲུག་ཟླ་བའི་ཚེས ༡༥ ཉིན་མོར་མཁན་ཆེན་ཚུལ་ཁྲིམས་བློ་གྲོས་ཀྱི་འཁྲུངས་སྐར་ལ་མགོ་ལོག་པ་བྱང་ལི་ཁྲི་ཡིས་གུས་ཕུལ།

མདོ་སྔགས་རིག་པའི་ཚུ༵ལ་ལ་མཁྱེ༵ན་རྒྱ་ཡངས།།

སོར་བྱང་སྔགས་ཀྱི་ཁྲི༵མས་གཙང་བརྩེ༵་ཆེན་ཁྱེད།།

གདུལ་བྱ་འདུལ་ཐབས་བློ༵་ཡི་ནུ༵ས་པ་རྒྱས།

མཁས་བླུན་མགྲིན་གཅིག་གྲོ༵ས་མཐུན་ཀུ༵ན་མཁྱེ༵ན་ལགས།།

               འཇིགས་མེད་སྟོབས་རྒྱལ་ནས་གུས་ཕུལ།

ཆོས་རྗེ་བླ་མའི་བཀའ་ལུང་ཚུལ་བཞིན་བསྟེན།།

ལུགས་གཉིས་ཁྲིམས་ཀྱི་སྨྲ་བའི་དབང་འབྱོར་བ།།

བསྟན་འགྲོ་རྒུད་པར་སེལ་མཛད་བློ་གྲོས་ཅན།།

སྐུ་ཚེ་སྐལ་བརྒྱའི་བར་དུ་འཁྲུངས་སྐར་བསུ།།

           ཉག་ཐོ་ཡོར་རམ་དམ་ཆོས་འོད་ཟེར་གྱིས་གུས་ཕུལ།

ཡོན་ཏན་ལེགས་ཚོགས་བྱེ་བའི་ཚུལ་འཆང་སྟེ།།

གཙུག་ལག་གསེར་གྱི་སྒོ་མོ་རབ་ཡངས་པའི།།

བཤེས་གཉེན་དམ་པ་ཡོན་ཏན་ཀུན་རྫོགས་པ།།

ཟླ་བྲལ་སྨྲ་བའི་དབང་པོའི་འཁྲུངས་སྐར་བསུ།།

                                དབལ་ཚས་གུས་ཕུལ།

དུས་རབས་གསར་བའི་སྟོན་པ་འགྲོ་བའི་མགོན།།

ཤར་ནུབ་རྒྱ་མཚོའི་རྐང་གཉིས་ཡིད་སྨོན་ཤོར།།

ཕྱི་གཙང་ནང་གཙང་པདྨའི་སྦུབ་ལྟར་གཙང་།།

ཀུན་མཁྱེན་གཉིས་པའི་བསྟན་པ་རྒྱས་གྱུར་ཅིག།

ཅེས་ཉི་མ་ནུབ་ཕྱོགས་ཀྱིས་ཡུལ་ནས་རྒྱལ་ཁམས་པ་རིག་འཛིན་གྲུབ་པ་མཐར་ཕྱིན་ནས་འཁྲུངས་སྐར་ལ་ཕུལ་བའོ།།

མདོ་སྔགས་ཆོས་ཀྱི་ང་རོ་རྟག་སྒྲོག་པ།།

གནའ་དེང་རིག་པའི་གཡུལ་རལ་ཡོངས་སུ་རྒྱས།།

ཤར་ནུབ་མཁས་པའི་དབུས་ན་མངོན་བརྗིད་པ།།

གངས་རིའི་མིག་གཅིག་གངས་ཀྱི་སེང་གེ་གང་།།

སྐུ་ཚེ་བརྟན་ཅིང་མཛད་འཕྲིན་མཐར་རྒྱས་ཤོག།།

                          ཁྲོཾ་རྒྱལ་སྲས།

འཕྲིན་སྟེགས་འདི་རུ་སྔ་འགྱུར་གྱི་མཁས་གྲུབ་སྐྱེས་ཆེན་དག་གི་གསུང་དང་།  སྔ་འགྱུར་ཞབས་ཞུ་ཚན་ཆུང་གི་ལས་རིམ།དེ་བཞིན་ཚན་ཆུང་གིས་ཆེད་ཞུས་མཁས་དབང་གང་མང་གི་གསུང་བཤད་སོགས་ཆེད་སྤེལ་བྱེད་བཞིན་ཡོད་པས་གསན་གཟིགས་གནང་བར་དགའ་བསུ་ཞུ།